معن حمد عريج

 الشاب (كرم ) وحيدا لأمّه توفاه الله فماذا قالت فيه باللهجة المحكية ( كرم) كيف روحي بَدّا تهدا وكيف عيني بَدّا تنام بعد ما الموت غيّب عن عيني الغالي كرم كرم يا روح الروح يا إبن لحمي ودمي كيف بتتركني وتروح أثقل من جبل همّي غيابك زودلي الجّروح قتلني الشوق يا إمّي كيف بدّي مضّي العمر وأطول من دهر يومي دمعي فوق خدي نهر طعم العلقم بفمّي كإنها الشمس غابت والدنيا صارت عتمي بعدك افراحي ماتت وعشّش بقلب الظلام كيف روحي بدّا تهدا وكيف عيني بدّا تنام بعد ما الموت غيّب عن عيني الغالي كرم كرم يا وحيد أمك يا حبيب القلب مشتاقة لصدري ضُمك بكل حنان بكل حب وشمّة عشق شمّك يا أغلى وأجمل شب من يوم ال إجا علمك تهت وضيّعت الدرب وصار الحزن بيتي مات الفرح بالقلب يا ربّي دخل إسمك رجع كرم يا رب أو عجّل بموتي شو عاد تنفعني الأيام كيف روحي بَدّا تهدا وكيف عيني بَدّا تنام بعد ما الموت غيّب عن عيني الغالي كرم قوم شوف إختك يا كرم تنادي وتقول يا خيّي رد عليها يا إمّي احترق قلبها اخطيّي يل كنت شمعة فرح بعمري وأغلى هديّي كيف تبدّلني بالموت يا قلبي ونور عنيّي يا ريتني كنت التابوت ويجمعنا القبر اسويّي أونّس روحك الحلوي وأغنيلك غنّيي وأبوس عيونك الكحلا والخدود الورديّي أتلمس وجهك بإيدي وأرقيّلك رقيّي ومن كل قلبي أدعيلك يبعد عنّك الظلاّم كيف روحي بدّا تهدا وكيف عيني بدّا تنام بعد ما الموت غيّب عن عيني الغالي كرم بقلمي معن حمد عريج